Bizkaia Maitea Aldizkaria

• 

Kresalaz bustitako dorrea

Arrantzaleen Museoa

Aingeru Astui. Arrantzaleen Museoko zuzendaria.

Arrantzaren bizimodua, lana eta teknika erakusteko museoa Ekipamendu horretan euskal kostaldeari eta arrantza-portuei loturiko alderdiak ikus daitezke: Bizimodua eta horren lotura itsasoarekin, ontziak eta arrantza eta nabigazioko teknikak. Erakusketa iraunkorrak eta aldi baterakoak eskaintzen ditu, baita bisita gidatuak ere.

Bermeoko armarriaren aurrean gelditzen garenean, balea eta hura ehizatzen saiatzen ari diren bost arrantzale ikusten ditugu. Zetazeoak, desafiatzaile, hortz zorrotzak erakusten ditu eta arrantzaleak, bitartean, beren betebeharra gauzatzen ari dira, arpoiaren eta arraun-ontziaren laguntzarekin bakarrik. Ezin da Bermeoko historia ulertu, ezta Bizkai eta Euskadikoa ere, Kantaurira begiratu gabe, Portu Zaharreko kaietatik ibili gabe edo oraindik arrantzan jarduten duten ontziak zenbatu gabe.

Badirudi Bermeoko Hiria olatuek zizelkatu eta itsas haizeek moldatu dutela. Horregatik, duela ia hirurogeita hamar urte sortu zen irudi hori gordetzeko beharra erakusketa iraunkor batekin. Horrela, 1948an jaio zen Arrantzaleen Museoa, udalerrian zutik irauten zuen azken dorretxean bertan: Ertzilla Dorrean. Hiriko ekialdeko Dorre hori Monumentu Nazional izendatu zuten 1944an, eta horri esker, hain zuzen, ez zen eraitsi orduan oso egoera txarrean zegoen higiezina, ohiko etxe batekin ordezteko. Hiru urte geroago, Bizkaiko Aldundiak erosi zuen, eta zaharberritu egin zuen Luis Mª de Gana jaunaren zuzendaritzapean. Orduan, ezkutuko arkuak topatu zituzten fatxadan, baita lau zutabe oktogonal isabeldar ere beheko solairuan.

Eraikinaren jatorria ezezaguna da, baina haren ezaugarrietan oinarrituta, XV. mendeko azken aldikoa dela uste da. Eraikin hiritarra eta komertziala da, sei aldeko oinplano irregularrekoa, eta estaldurak isurialde kopuru bera dauka.

Hormek aretoak mugatzen dituzte, eta bertan, modu atsegin eta didaktikoan, euskal itsas hondoko kontuak ezagutu ditzakegu, arrantzaleen ohiturak, bazterrean sortutako industriak, ontziak eta dena ahalbidetzen duten teknikak, sare motak edota arte desberdinak ere bai. Beraz, arrantzaren inguruko guztia soilik erakusten duen museo urrietako bat da mundu osoan.

Dorrearen eta bertako biztanleen historia areto batean islatuta dago. Gainera, Euzkadiko Gudaontzidiaren historia ere ezagutu dezakegu, haren nukleo nagusia euskal arrantzaleek osatzen baitzuten.

Duela gutxi, eraikinaren azken zaharberritzearen ostean, jatorrizko itxura berreskuratu eta egonkortasuna sendotzeko, hainbat garbiketa-lan egiteaz gain, erakusketa-aretoak modernizatu egin dira, baita museoko zerbitzuetara zuzendutakoak ere. Obra horiek, gainera, erakusketa iraunkorra berritzeko baliatu da, teknika expografikorik modernoenak erabilita, erakusketa egungo gizartearen eskarietara egokitzeko helburuarekin. 

Fitxategi hauek kontsultatzeko Adobe Reader dohainiko programa behar duzu, erabili esteka deskargatzeko.